Er að vinna í uppskriftavef. Hér er skissa af forsíðu hans, bara svona til gamans :) Ég er ekki alveg búin að fullkomna verkið en þetta er áttin sem ég er að fara í. Ferskt.

Vefsíða Antons og Bergs. Þeir vinirnir eru grafískt þenkjandi og útlitið kom úr þeirra smiðju, þannig að mitt verkefni var að koma síðunni fyrir þínar sjónir í vafranum þínum, iPadnum þínum, símanum þínum..

Ný vefsíða Yoga Shala fór í loftið fyrir skemmstu. Ég færði síðuna yfir í vefumsjónarkerfi sem heitir WordPress og gaf útlitinu andlitslyftingu þó svo að hönnunin hafi haldið sér í stórum dráttum.

Ég nota yfirleitt WordPress vefumsjónarkerfið fyrir síður sem ég set upp, einfaldlega vegna þess að það er jafn auðvelt að uppfæra efni í kerfinu eins og að senda tölvupóst. Allir geta notað það.

Þetta þarf ekki að vera flókið!

Kíktu á síðu Yoga Shala.

Í dag eru vefhönnuðir ekki einungis að vefa fyrir staðlaða skjástærð skjás fyrir borðtölvu, heldur er hinn almenni notandi með fartölvu með bæði litlum og stórum skjá, borðtölvu með skjá af öllum stærðum og síðast en ekki síst er að nefna snjallsíma og spjaldtölvur.

Útaf því hve breitt úrval tækja sem geta tengst internetinu eru nú í boði fyrir hinn almenna notanda má segja að vefhönnuðir þurfi að hugsa hlutina í víðara samhengi. Gera þarf ráð fyrir hvernig notandi með snjallsíma eða spjaldtölvu muni upplifa vefsíður sem líka eru í fullri stærð. Í dag er hægt að hanna og kóða síður, á auðveldari hátt en áður,  sem virka vel fyrir allar skjástærðir, vefsíðurnar verða teygjanlegar má segja, án þess þó að þær séu teygðar. Allir sem eru á byrjunarreit eða íhuga endurhönnun á núverandi vefsíðu ættu að stíga inní nútímann og biðja sinn hönnuð og/eða kóðara að búa þannig um hnútana að nýi vefurinn sé teygjanlegur og auðlesinn í öllum skjám.

“Hversvegna einusinni að spá í því hvernig skjá notendur eru með?.. ég sé vefinn fínt í minni tölvu.” 

Þú gætir verið að velta þessu fyrir þér. Ástæðan er sú að notkun snjallsíma, spjaldtölva og fartölva með lítinn skjá fer ört vaxandi. Fólk  sem notar tölvu ekki í mikið meira en að skoða internetið og lesa tölvupóst eru mun líklegra til þess að fjárfesta í snjallsíma eða spjaldtölvu frekar en stórri borðtölvu. Þetta á líka við á Íslandi, þetta er ekki lengur staðreynd sem á bara við útlönd.  Æ fleiri fyrirtæki eru að koma sér upp vef sem hægt er að skoða í öllum skjástærðum sem og sérstökum farsímavefjum og hinum svokölluðu “öppum”.. sem er auðvitað ekki íslenska, ég hef heyrt talað um smáforrit og líka bara forrit fyrir app, sem stendur fyrir application, en þetta er auðvitað allt gert til þess að koma á móts við viðskiptavininn sem, eins og segir, er í auknum mæli farinn að nota allt önnur tæki en hér fyrir nokkrum árum við netskoðun.

Gott dæmi sem nefna má í sambandi við mikilvægi þess að vefsíðan sé lesanleg í t.d snjallsímum eru vefsíður ferðaþjónustufyrirtækja. Ferðamenn eru með snjallsíma í auknum mæli og geta farið, að undanskildum örfáum blindpunktum hér á landi, á netið alltaf, allan sólarhringinn, nær hvar sem er. Það er augljós ávinningur að ferðamaðurinn geti skoðað gistingar- og afþreyingarmöguleika meðan hann ferðast.

Annað gott dæmi eru vefsíður fréttamiðla. Hefurðu ekki tekið eftir fólki á gangi, í strætó, að bíða einhversstaðar að það eru allir í símanum öllum stundum? Það er þar sem þú nærð fleiri lesendum inn, þar með auknum auglýsingatekjum og mun víðtækari dreifingu.

Ég þarf ábyggilega ekki að taka það fram að fáir þú vefsíðu, nýja eða endurhannnaða, hjá mér verður hún líka vel læsileg í öllum þessum skjám.

Í dag setti ég nýjan vef minn í loftið. Velkomin á hann.

Vefsíða Kjöthornsins á Hvammstanga hefur fengið langþráða yfirhalningu. Útkoman er meiri yfirsýn og þægindi fyrir notandann.

Næsta verk fyrir þessa vefsíðu er að gera hana þannig að hægt sé að skoða hana í snjallsímum og spjaldtölvum.

Kíktu á hana.

Þetta er bloggið mitt. Fyrir ekki svo löngu hannaði ég það og kóðaði uppá nýtt… aftur. Nú er það með nýju útliti og hægt að skoða það í snjallsímum og spjaldtölvum.

Vefsíða fyrir snyrtistofu í hjarta Kaupmannahafnar. Unnin í Photoshop, Illustrator og var sett upp í WordPress.

Ungi maðurinn sem vildi stofna markaðsfyrirtæki og ég hannaði lógó fyrir, þurfti líka vefsíðu.

Þetta er vinnumynd af vefsíðunni hans, en því miður komst hann aldrei það langt að stofna fyrirtækið, þó stórhuga væri.

Síðusniðið (layout) er engu að síður alveg ágætt.

Ég gerði tilraun á því hvað ég gæti verið fljót að gera vefsíðu. Þessi er afskaplega einföld og tók líka bara eina dagstund.